Мәжіліс депутаты Айдос Сарым украин дрондарының Каспий құбыр консорциумының (КҚК) инфрақұрылымына шабуылын қолдаған қазақстандықтардың жазбаларын тексеруді сұрады.
Депутаттың сауалында қараша айының соңында "теңіз дрондарының Каспий құбыр консорциумының терминалына шабуылы салдарынан айлақ құрылғысы істен шыққаны" жазылған. Соның салдарынан қазір бір ғана айлақ құрылғысымен жұмыс істеп жатқан терминалдың өткізу қабілеті де нашарлаған.
"Мұнай тасымалдау көлемінің азаюы ел үшін айтарлықтай экономикалық тәуекел мен шығынға әкеп соғады. Каспий құбыр консорциумы (КҚК) арқылы экспорттан жыл сайын шамамен 30 миллиард доллар кіріс кіреді. Үштен бір бөлігі Ұлттық қорға түседі, бұл елдің салық түсімдерінің шамамен 20%-ын құрайды. Сарапшылардың бағалауы бойынша, ұзақ уақытқа тоқтап қалса, ай сайынғы шығын көлемі 500 миллион долларға жетуі мүмкін" деп жазылған депутаттың сауалында.
Оның сөзінше, соған қарамастан әлеуметтік желіде "мемлекет үшін маңызды инфрақұрылымға соққыны" ашық "қолдайтын және мақұлдайтын" азаматтардың жазбалары шығып жатыр. Бұл "ұлттың мүддесіне тіке нұқсан келтіреді" деді ол.
Ол бас прокурор Берік Асылов пен ақпарат министрі Аида Балаеваға жолдаған сауалында "Қазақстан үшін маңызды инфрақұрылым нысанына соққы жасауға шақырған" азаматтардың әрекетіне құқықты баға беруді сұрады. Атап айтқанда, мұндай әрекетті "терроризмді насихаттау немесе терроризмге жария түрде шақыру" және "мемлекетке опасыздық" жасау баптары бойынша тексеру қажеттігін алға тартты.
Депутат сонымен бірге "Қазақстан экономикасы үшін өте маңызды мұнай құбырын бұзуға бағытталған ақпаратты жариялауға болмайтыны" жөнінде халық арасында "түсіндіру жұмысын" жүргізуді сұрады.
Қазақстан СІМ Новороссийскідегі КҚК инфрақұрылымына шабуылға байланысты бұған дейін Украинаға наразылық білдірген. Оған жауап берген Украина СІМ шабуыл Қазақстан немесе басқа үшінші елге бағытталмағанын, бар мақсаты басқыншының әрекетін тежеу екенін айтқан.
Қазақстан Каспий құбыр консорциумына (КҚК) шабуыл салдарынан 480 мың тонна мұнайын жоғалтты деп мәлімдеді 11 желтоқсанда Қазақстан энергетика министрі Ерлан Ақкенженов журналистерге.
Ол сонымен бірге Қазақстан Каспий құбыр консорциумынан бас тартпайтынын, оған балама бағыт жоқ екенін айтты. Оның сөзінше, биыл аталған құбыр арқылы 72 млн тонна мұнайды айдау жоспарда болған, алайда қазір бұл жоспар 68 млн-ға дейін төмендетілген.
Қазақстан қазір басқа бағыттар бойынша да мұнай тасымалдауды арттыруға тырысып жатыр. Алайда сарапшылар бұл жағынан Қазақстанның мүмкіндігі шектеулі дейді.
